рубрика • Молитвенник •

Молитва о примирении враждующих

Влады́ко Человеколю́бче, Царю́ веко́в и Пода́телю благи́х, разру́шивший вражды́ средосте́ния и мир пода́вший ро́ду челове́ческому, да́руй и ны́не мир рабо́м Твои́м, вкорени́ в них стра́х Твой и друг к дру́гу любо́вь утверди́: угаси́ вся́ку ра́спрю, отъими́ вся разногла́сия и собла́зны. Я́ко Ты еси́ мир наш и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Молитва об отправляющемся в воздушное путешествие

Господи Иисусе Христе, Боже наш, стихиям повелеваяй и вся горстию содержай, Егоже бездны трепещут и Емуже звезды присутствуют. Вся тварь Тебе служит, вся послушают, вся Тебе повинуются. Вся можеши: сего ради вся милуеши, Преблагий Господи. Тако и ныне убо, Владыко, рабов Твоих сих (имена) моления теплыя приемля, благослови путь их и воздушное шествие, запрещая бурям же и ветром противным, и лодию воздушную целу и невредиму соблюдая. Спасительное и небурное по воздуху провождение им даруя и благое намерение совершившим им весело во здравии и в мире возвратитися изволь. Ты бо еси Спас и Избавитель и всех благих небесных и земных Податель и Тебе славу возсылаем со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.

Молитва о хотящем по водам плыти

Владыко Господи Иисусе Христе, Боже наш, по водам, яко по суху, ходивый и святых Твоих учеников и апостолов в корабли соплавателями Своими быти сподобивый, бури же ветреной запретивый и морским волнам утишитися повелевый; Ты и ныне, смиренно молим Тя, Спасе, с рабами Твоими сими (рабом Твоим сим) купно плыти (в корабли сем), изволи, всякий противный ветр и бурю утоляя; воздвигни же изрядные и благовременные ветры ко благополучному плаванию, кормчий им (ему) Сам всегда буди, спасительное, небурное и ведренное пристанище им (ему и кораблю) бывая, и якоже Петра от потопления, тако и рабов Твоих сих (раба Твоего сего) от наветования всех врагов видимых и невидимых, бед же и нужд и устрашений, всесильною Твоею десницею державно избави и во свояси добре и благополучно, свое предложение и благое намерение совершивших (совершившаго) здраво и весело в мире возвратитися благоизволи, Твою богатую и неистощимую благодать во всех делах их (его) богатно им (ему) даруй и корабль цел и невредим соблюди. Ты бо еси Спас, Избавитель, и всех благ небесных и земных богатый Податель, и Тебе славу возсылаем со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.

Молитва хотящему идти в путь

Боже, Боже наш, истинный и живы́й путь, путеше́ствовавый со слугою своим Иосифом, спутешествуй Владыко и рабу твоему́ (имя), и вся́каго обуревания и навета избави, и мир и благомо́щие паки устрой: всякия правды про́мысл творя́ща по заповедем твои́м, и исполнена житейских и небесных благ бывша, па́ки возвратитися благоволи́.

Яко твое есть Царство и сила и слава Отца и Сына и Святаго Духа, ныне и присно и во веки веков, аминь.

← Предыдущая публикация     Оглавление выпуска