Рубрика • Молитвенник •

МОЛИТВА ОТ НАВЕТОВ ВРАЖИИХ

Господи Иисусе Христе, Боже мой, посещаяй тварь Свою, Емуже явлены страсти моя и немощь естества нашего человеческого и крепость супостата нашего! Ты Сам покрый мя от злобы его, зане сила его крепка, естество же наше страстно и сила наша немощна. Ты убо, о Благий, ведый немощь нашу и носяй неудобство бессилия нашего, сохрани мя от смущения помыслов, и достойна сотвори мя службы Твоея святыя, да не како в страстех моих растлю сладость ея, и обрящу безстуден пред Тобою и дерзостив. Господи, пресладкий мой Иисусе, помилуй и спаси мя.

МОЛИТВА ПРИ ВКУШЕНИИ ПРОСФОРЫ И СВЯТОЙ ВОДЫ

Господи, Боже мой, да будет дар Твой святый: просфора и святая Твоя вода во оставление грехов моих, в просвещение ума моего, во укрепление душевных и телесных сил моих, во здравие души и тела моего, в покорение страстей и немощей моих по беспредельному милосердию Твоему, молитвами Пречистыя Твоея Матери и всех святых Твоих. Аминь.

МОЛИТВА ПЕРЕД ОБРАЗОМ ПРЕСВЯТОЙ БОГОРОДИЦЫ

О Пресвятая Дево, Мати Господа Вышняго, Заступнице и Покрове всех, к Тебе прибегающих! Призри с высоты святыя Твоея на мя, грешнаго, припадающаго ко пречистому образу Твоему; услыши мою теплую молитву и принеси ю пред возлюбленнаго Сына Твоего, Господа нашего Иисуса Христа; умоли Его, да озарит мрачную душу мою светом Божественный благодати Своея, да избавит мя от всякия нужды, скорби и болезни, да низпошлет мне тихое и мирное житие, здравие телесное и душевное, да умирит страждущее сердце мое и исцелит раны его, да наставит мя на добрыя дела, ум мой убо от помышлений суетных да очистит, исполнению же заповедей Своих мя научив, от вечныя муки да избавит и Своего Небеснаго Царствия да не лишит мя.

О Пресвятая Богородице! Ты, «Всех скорбящих Радосте», услыши и мя скорбнаго; Ты, именуемая «Утоление печали», утоли и мою печаль; Ты, «Купино Неопалимая», сохрани мир и всех нас от вредоносных огненных стрел врага; Ты, «Взыскание погибших», не попусти и мене погибнути в бездне грехов моих. На Тя бо по Бозе вся моя надежда и упование. Буди мне в жизни временней Заступница, и о жизни вечней пред возлюбленным Сыном Твоим, Господом нашим Иисусом Христом, Ходатаица. Научи мя Тому убо с верою и любовию служити, Тебе же, Пресвятая Мати Божия, Преблагословенная Марие, благоговейно чтити до скончания дней моих. Аминь.

← Предыдущая публикация  Оглавление выпуска