Рубрика • Молитвенник•

ВОЗДЫХАНИЯ ГРЕШНОЙ ДУШИ КО ХРИСТУ
Святителя Тихона Задонского

Святитель Тихон Задонский

I.

Изведи из темницы душу мою, исповедатися имени Твоему.

Иисусе Сыне Божий, помилуй мя.

Привлецы мене, да прииду к Тебе.

В темнице заключен есмь, Господи, и тьма окружает мя; связан многими узами железными, и несть ми ослабления. Расторгни узы, да свободен буду. Прожени тьму, да узрю свет Твой. Изведи из темницы, да прииду к Тебе.

Даждь ми уши слышати Тя.

Даждь ми очи видети Тя.

Даждь ми вкус вкусити Тя.

Даждь ми ухание благоухати Тя.

Даждь ми нозе приити к Тебе.

Даждь ми уста глаголити о Тебе.

II.

Иисусе Сыне Божий, помилуй мя!

Буди моей души пища и питие.

Буди источник жаждущей души моей.

Буди свет помраченной души моей.

Буди отрада в скорби моей.

Буди веселие в печали моей.

Буди избавление противу пленения моего.

Буди мир и покой противу злыя совести моея.

Буди премудрость противу безумия моего.

Буди ходатай противу клеветников моих.

Буди оправдание противу грехов моих.

Буди освящение противу нечистоты моея.

Буди победа противу неприятелей моих.

Буди щит противу гонителей моих.

Буди ходатай мой противу гнева Божия.

Даждь ми сердце боятися и любити Тя.

Настави мя, Господи, на путь Твой, и пойду во истине Твоей.

Ты бо еси путь, истина и живот.

Возми мое от мене, и даждь ми волю творити волю Твою благую.

Отыми «сердце каменное», и даждь «сердце плотяное», Тебе любящее, Тебе почитающее, Тебе последующее.

Даждь ми око, да узрю любовь Твою.

Даждь ми око, да узрю смирение Твое и последую ему.

Даждь ми око, да узрю кротость и терпение Твое, и последую ему.

Рцы слово, и будет все.

Ибо слово Твое дело есть.

Верую, Господи, помози моему неверию.

Буди жертва за грехи моя.

Буди укрепление в слабости моей.

Буди живот противу смерти моей.

Буди совет противу недоумения моего.

Буди сила противу немощи моея.

Буди мне, сиру, Отец вечный.

Буди Судия противу оскорбляющих мя.

Буди Царь противу диавольскаго царствия.

Буди вождь в пути моем.

Буди заступник в час смерти моея.

Буди покровитель по смерти моей.

Буди жизнь вечная по воскресении моем.

Иисусе Сыне Божий, помилуй мя.

Даждь славу имени Твоему, мне же спасение вечное.

Не нам, Господи, не нам, но имени Твоему даждь славу.

Аминь.

МОЛИТВА ПРЕПОДОБНОМУ ЛЕОНИДУ УСТЬНЕДУМСКОМУ

Леонид Устьнедумский

О священная главо, преподобие отче Леониде! Земный ангеле и небесный человече! Светильниче пресветлый, край наш Прилузский озаряяй! Тебе, угодниче Божий, неистощимое от Всеблагого Владыки благодати и даров дадеся сокровище: с верою к тебе приходящих утешати, телесныя и душевныя недуги отгоняти. К тебе убо прибегаем, припадающе молимся. Не презри нас, молящихся, и твоея просящих помощи, испроси нам у Христа, да сотворит с нами знамение во благо и преобразит наше мрачное житие. Сердце наше прокаженное очистит, и обитель сотворит для Своего вселения, яко без Него не можем творити ничесоже. Да всякое наше во благо желание исполнит. Да тако угождающе Ему, победим борющаго нас диавола, внидем иде же все святии пребывают и прославляют Отца и Сына и Святого Духа во веки. Аминь.

← Предыдущая публикация     Оглавление выпуска