Рубрика • Молитвенник •

Молитва пред иконой Божией Матери «Неопалимая Купина»

О пресвятая и преблагословенная Мати сладчайшаго Господа нашего Иисуса Христа! припадаем и покланяемся Тебе пред святою и пречестною иконою Твоею, еюже дивная и преславная чудеса содеваеши, от огненнаго запаления и молниеноснаго грома жилища наша спасаеши, недужныя исцеляеши, и всяко благое прошение наше во благо исполняеши. Смиренно молим Тя, всесильная рода нашего Заступнице, сподоби ны немощныя и грешныя, твоего матерняго участия и благопопечения. Спаси и сохрани, Владычице, под кровом милости Твоея Церковь святую, всю страну нашу православную, и вся ны, припадающия к Тебе с верою и любовию и умиленно просящия со слезами Твоего заступления. Ей, Госпоже всемилостивая, умилосердися на нас, обуреваемых грехами многими и не имущих дерзновения ко Христу Господу просити Его о помиловании и прощении: но Тебе предлагаем к Нему на умоление, Матерь Его по плоти: Ты же, Всеблагая, простри к Нему богоприимнеи руце Твои и предстательствуй за нас пред благостию Его, просящи нам прощения прегрешений наших, благочестнаго мирнаго жития, благия христианския кончины и добраго ответа на страшнем суде Его. В час же грознаго посещения Божия, егда огнем возгорятся домы наши, или молниеносным громом устрашаеми будем, яви нам милостивное Твое заступление и державное вспоможение: да, спасаеми всесильными Твоими ко Господу молитвами, временнаго наказания Божия зде избегнем и вечное блаженство райское тамо унаследуем, и со всеми святыми воспоем Пречестное и Великолепое Имя покланяемыя Троицы, Отца и Сына и Святаго Духа и Твое велие к нам милосердие, ныне и присно и во веки веков, аминь.

Молитва на брань блуда

Господи Иисусе Христе, Боже наш, скорый помощниче в бедах и защититель немощных от искушений диавола, услыши мя, недостойного раба Твоего, призывающаго святое Имя Твое, и не допусти до падения греховнаго, погаси страсть разжженную и направь разум мой на спасительные размышления, да держусь блаженных Твоих заповедей.

Господи Боже, не даждь ми уподобитися скоту несмысленному, не могущему обуздать плоть свою, влекущемуся страстьми в грязь и позор пред святым Твоим народом, иже есть Церковь верных, искупленная Твоею кровию.

Пусть ревность Твоея славы и страх быти отвержену Тобою попалят страсти, разжигаемые во мне диаволом. Не даждь ему посмеяться надо мною. Ты зриши сердце мое, желающее творити Твою волю, но не имущее силы творити ю. Вонми ми, не премолчи, заступи мя и низложи губителя, да не умножатся грешницы, да узрят праведницы и возвеселятся, и прославят Тя, хранящаго рабы Своя в чистоте и непорочности.

Яко свят еси, Боже наш, во святых почиваяй, грешных милуяй и спасаяй, и Тебе славу возсылаем, со Безначальным Твоим Отцем и Пресвятым Духом, ныне и присно и во веки веков, аминь.

← Предыдущая публикация   Оглавление выпуска